Wednesday, September 1, 2010

逃*大雨﹣黃色暴雨坪洲遊

朝早睇新聞,天文台話今日天晴,近中午,出發去坪洲。。。


搭車去到中環,落狗屎,無帶遮;沿住天橋去到IFC,hea一輪,望佢停雨,點知,閃埋電㖭!諗住影下閃電相,開機佢又唔閃,一關機即閃,吹啤;博佢係過雲雨,跑去碼頭上船;船上,坐後面嘅一班自稱加拿大番嚟嘅叔叔嬸嬸傾計嘈到拆天,想暈


出碼頭,雨細左,即去搵坪洲大熱嘅蝦多士,個個話好味架,但係。。。
入面大部份係薯蓉嚟架喎,好少蝦咋喎,網上話佢唔用雪蝦,係就係,但係我食得出D蝦死左好耐喎;最叻係佢唔肥lum lum囉
係咪我嘅問題呢?



跟住行上手指山,見天陰陰,專吼D雨點嚟影啦!呢個時侯,前面出現一隊大家庭,有件阿伯同阿嬸講野大聲到烏鴉都嚇死,貓兒都嚇死;更不幸嘅係,船上加拿大幫竟然喺後面出現,OMG;我情願放慢腳步比佢地過,我唔要surround sound呀!
上到山頂,以為去左街市,影左一陣,諗住避佢地,由第二條路落山啦,落左廿零級樓梯,聽到大聲公竟然話走啦,仲要係行緊我後面㖭;而加拿大幫亦跟住一齊喎;我。。。。即刻上番山頂再影過,山頂得番幾個正常人,靜哂;呢個時候,奇蹟嚟啦。。。(準備比趣啦)


太陽慢慢射穿一層層嘅厚雲,出現耶穌光,咁耐以嚟我係未影過耶穌光架,狂影。呢張,撞到有鷹飛過,我至愛~



左邊,我落左漸變藍filter,右邊,漸變橙filter,經過filter濾光,再耶穌D呀!


跟住落山;呢三張,用左相機日落嘅button,幾好(日落牆頭草)



(日落碼頭)



(日落單車)


最靚邊張呢?我就幾滿意啦!

17 意見:

Maisy said...

耶穌光好靚,漸藍漸橙都靚,有無企上石躉上影呀?
你有咁多部機既?影埋塊filter添。

Tee said...

Banner 咁長嘅。

l.minor said...

正呀!不過行哂雷你都咁勇殺入去?重要上山頂,好危險喎!
我反而最鍾意你張”藉著雨點逃大雨”!!!耶穌光同剪影兩張都鍾意!

蝦多士咁差?上次我食真係唔錯架喎!

ayclui said...

大叔, 今次個版面靚仔哂, 比98分你~

蝦多士呢, 我食果陣都係咁上下...我記得個老闆女話因為"亞so效應"之後, 佢爸爸做到手都勞損哂...又唔好意思要d客山長水遠入到去無得食...
所以呢...d老闆其實唔鍾意亞so 攪佢地, 費事因為d虛火得失哂d長期客喎...

卡臣 said...

日落碼頭<---至有韻味,讚

naruto said...

Maisy:
石躉。。。企上條柱上要影耶穌光,係咪你講嘅石躉?

Tee:
急救中,每次一轉版面,都有D野亂左

l.minor:
食完蝦多已經停雨兼天開始光,所以先上去啫

逃大雨我都鍾意,唔係點會排第一張出場呢?呵呵
(IFC行天橋去碼頭,落電梯前嘅玻璃天花嚟架)

蝦多士。。。我對蝦嘅新鮮度好敏感,真係麻麻咋

ayclui:
上次劣評如潮,咪又改下囉!有你讚下,都好:)

無可厚非,去一個旅遊路線有景總要有美食,阿so又好,雜誌都好,梗係搵樣特別D嘅吸引你,講真,賣相靚,格局又夠風味,有齊大賣條件,佢其實可以做好D

卡臣:
果張全靠相機嘅function,現場睇其實無乜feel,哈哈

supageti said...

好靚呀啲相 ~~~ :)

應該入黎大埔嘛,果日一滴雨都無,曬到變蕉 ~~~~

naruto said...

supageti :
大埔如果我影相,你有邊樹推介呢?

phyllis said...

耶穌光好正!

supageti said...

有無相影似乎係視乎影果個喎 ~~~ :p

最近我睇到網友影泰亨村荷花超靚,不過唔知開完未 ~~~

naruto said...

phyllis:
多謝:)

supageti:
有無相影似乎係視乎影果個喎。。。有時乜都無,真係神仙難變

maymay said...

想唔讚都唔得,d相勁靚呀!

我响日本都影過耶穌光,等我摷番張相出來先~

naruto said...

maymay:
等你

邪留丸~ said...

Banner好靚喎~
最尾嗰張單車同日落,
都好like呀~

l.minor said...

下次我去釣魚,買蝦時,搵你幫手"索"下d蝦新唔新鮮呀!

Billy said...

隻字體叫咩名...好正

naruto said...

Billy:
M 和古圓體T U

l.minor:
釣魚D蝦,你賣釣魚舖游水嘅定街市死果D先?

Related Posts Plugin for WordPress, Blogger...